ممبئی: بالی وڈ کے معروف ڈائریکٹر اور رائٹر، ابھینو کاشیپ، جنہوں نے سلمان خان کی کامیاب فلم “دبنگ” کی ہدایت کاری کی تھی، نے اداکار اور ان کے خاندان پر سنگین الزامات لگائے ہیں۔ ابھینو کاشیپ نے سلمان خان کو “غنڈہ، بدتمیز اور گندا انسان” قرار دیا ہے اور ان کے خاندان کو انتقامی رویہ رکھنے والا قرار دیا ہے۔
یہ الزامات اس وقت سامنے آئے جب ابھینو کاشیپ نے اپنے سوشل میڈیا اکاؤنٹ پر ایک تفصیلی پوسٹ شیئر کی، جس میں انہوں نے سلمان خان اور ان کے بھائیوں ا ارباز خان اور سہیل خان پر ان کے کیریئر کو تباہ کرنے کی کوشش کرنے کا الزام لگایا۔
ابھینو کاشیپ نے دعویٰ کیا کہ “دبنگ” کی کامیابی کے بعد، ارباز خان نے ان پر اس کا سیکوئل بنانے کے لیے شدید دباؤ ڈالا۔ جب انہوں نے ایسا کرنے سے انکار کیا تو ارباز خان، جو اس فلم کے پروڈیوسر بھی تھے، نے ان کے کیریئر میں رکاوٹیں ڈالنا شروع کر دیں۔ انہوں نے بتایا کہ کس طرح ان کے اگلے پراجیکٹس میں مسلسل رکاوٹیں ڈالی گئیں اور انہیں فلم انڈسٹری میں کام کرنے سے روکا گیا۔ انہوں نے کہا کہ سلمان خان اور ان کے بھائیوں نے مختلف پروڈیوسرز اور چینلز پر دباؤ ڈال کر ان کی فلموں کو نقصان پہنچایا۔
ابھینو کاشیپ نے اپنی پوسٹ میں یہ بھی کہا کہ سلمان خان صرف ایک اداکار نہیں ہیں بلکہ وہ انڈسٹری میں طاقت کے ذریعے لوگوں کو دبانے کی کوشش کرتے ہیں۔ انہوں نے الزام لگایا کہ سلمان خان ان لوگوں کو ٹارگٹ کرتے ہیں جو ان کے اشاروں پر نہیں چلتے، اور اسی وجہ سے ان کا کیریئر خراب ہوا۔
یہ پہلا موقع نہیں ہے جب ابھینو کاشیپ نے سلمان خان پر اس طرح کے الزامات لگائے ہیں۔ اس سے قبل بھی وہ اپنے سوشل میڈیا پلیٹ فارمز پر اس طرح کے بیانات دے چکے ہیں۔ تاہم، اس بار ان کا بیان زیادہ سخت اور تفصیلی ہے، جس نے بالی وڈ میں ایک نئی بحث چھیڑ دی ہے۔
سلمان خان اور ان کے خاندان کی جانب سے اس معاملے پر تاحال کوئی باضابطہ بیان سامنے نہیں آیا ہے۔ تاہم، بالی وڈ انڈسٹری کے اندرونی حلقوں میں اس موضوع پر گرما گرم بحث جاری ہے۔ کئی لوگ ابھینو کاشیپ کی حمایت میں ہیں جبکہ کچھ کا خیال ہے کہ یہ الزامات ذاتی رنجشوں کی بنیاد پر لگائے گئے ہیں۔
