کیلی فورنیا: ٹیکنالوجی کی معروف کمپنی ایپل نے اپنے نئے آئی فون 17 سیریز کی رونمائی کی تاریخ کا باضابطہ اعلان کر دیا ہے۔ صارفین کا طویل انتظار اب ختم ہونے کو ہے، کیوں کہ کمپنی 9 ستمبر 2025 کو ایک خصوصی ایونٹ میں ان نئے ماڈلز کو متعارف کرائے گی۔
یہ ایونٹ ایپل کے ہیڈ کوارٹر، ایپل پارک، کیلی فورنیا میں منعقد ہوگا اور اسے “Awe Dropping” کا نام دیا گیا ہے۔ یہ تقریب ایپل کی آفیشل ویب سائٹ اور یوٹیوب چینل پر براہِ راست نشر کی جائے گی تاکہ دنیا بھر کے صارفین اسے دیکھ سکیں۔ پاکستانی وقت کے مطابق یہ ایونٹ رات 10 بجے شروع ہونے کا امکان ہے۔
رپورٹس کے مطابق، آئی فون 17 سیریز میں چار ماڈلز شامل ہوں گے: آئی فون 17، آئی فون 17 ایئر، آئی فون 17 پرو اور آئی فون 17 پرو میکس۔ اس سیریز کی سب سے خاص بات آئی فون 17 ایئر ماڈل ہے، جسے کمپنی اب تک کا سب سے پتلا اور ہلکا اسمارٹ فون بنانے جا رہی ہے۔ اس کی موٹائی صرف 5.5 ملی میٹر ہوگی، جو کہ ٹیکنالوجی کی دنیا میں ایک انقلابی قدم سمجھا جا رہا ہے۔
نئے آئی فونز میں اہم اپ گریڈز کی توقع ہے۔ پرو ماڈلز میں نیا A19 چپ سیٹ نصب ہوگا، جو کارکردگی اور بیٹری لائف کو بہتر بنائے گا۔ اس کے علاوہ، کیمرہ سسٹم میں بھی بڑی تبدیلیاں متوقع ہیں، جس سے تصاویر کا معیار مزید بلند ہوگا۔ آئی فون 17 پرو میکس میں پہلی بار 5000 ایم اے ایچ کی بڑی بیٹری دیے جانے کی بھی خبریں زیرِ گردش ہیں۔
لانچ ایونٹ کے بعد، آئی فون 17 سیریز کے پری آرڈرز 12 ستمبر 2025 سے شروع ہو سکتے ہیں، جبکہ ان کی عالمی سطح پر فروخت 19 ستمبر 2025 کے قریب متوقع ہے۔ اس کے ساتھ ہی نئے آئی فونز جدید آپریٹنگ سسٹم iOS 26 پر چلیں گے۔ ایونٹ میں صرف آئی فونز ہی نہیں بلکہ ایپل واچ سیریز 11، ایپل واچ الٹرا 3، اور ایئر پاڈز پرو 3 بھی پیش کیے جانے کا امکان ہے۔
