شاہ جی ٹرمینل کوہاٹ کے عوام کو جدید اور بہترین سفری سہولت کا آغاز ہے، وزیر اطلاعات شفیع جان

خیبرپختونخوا کے وزیر اطلاعات و تعلقات عامہ شفیع جان نے اتوار کے روز کوہاٹ میں جدید شاہ جی ٹرمینل کا باضابطہ افتتاح کر دیا۔ اس موقع پر مقامی عمائدین، ٹرانسپورٹ سے وابستہ افراد، کاروباری شخصیات اور شہریوں کی بڑی تعداد بھی موجود تھی۔افتتاحی تقریب سے خطاب کرتے ہوئے وزیر اطلاعات نے کہا کہ شاہ جی ٹرمینل کا قیام کوہاٹ کے عوام کیلئے ایک اہم سنگ میل ہے جس سے شہریوں کو جدید اور معیاری سفری سہولیات میسر آئیں گی۔ انہوں نے کہا کہ حکومت عوامی فلاح و بہبود اور بنیادی ڈھانچے کی بہتری کیلئے عملی اقدامات پر یقین رکھتی ہے۔ شفیع جان نے کہا کہ نئے ٹرمینل کی بدولت مسافروں کو بہتر انتظار گاہیں، منظم ٹرانسپورٹ نظام اور محفوظ سفری ماحول فراہم ہوگا جبکہ آمدورفت کے نظام میں بہتری سے شہریوں کو درپیش مشکلات میں نمایاں کمی آئے گی۔ ان کا کہنا تھا کہ جدید ٹرانسپورٹ سہولیات نہ صرف عوام کے معیارِ زندگی کو بہتر بناتی ہیں بلکہ مقامی تجارت اور معاشی سرگرمیوں کو بھی فروغ دیتی ہیں۔ انہوں نے مزید کہا کہ صوبائی حکومت شہریوں کو جدید سہولیات کی فراہمی کیلئے پرعزم ہے اور مختلف اضلاع میں ترقیاتی منصوبوں پر تیزی سے کام جاری ہے۔ ان کے مطابق شاہ جی ٹرمینل مستقبل میں کوہاٹ اور ملحقہ علاقوں کے درمیان سفری رابطوں کو مزید مؤثر بنانے میں اہم کردار ادا کرے گا۔ تقریب کے اختتام پر صوبائی وزیر نے ٹرمینل کے مختلف حصوں کا دورہ کیا اور انتظامات کا جائزہ لیا۔ شرکاء نے اس منصوبے کو علاقے کی ترقی اور عوامی سہولت کیلئے ایک مثبت پیشرفت قرار دیتے ہوئے امید ظاہر کی کہ اس سے ٹرانسپورٹ کے شعبے میں مزید بہتری آئے گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

Thank you for reading this post, don't forget to subscribe!