اجلاس میں وزیر اعلیٰ بلوچستان میر سرفراز بگٹی نے صوبے میں امن و امان کی صورتحال پر بریفنگ دی۔ صدر مملکت نے کہا کہ دہشت گرد عناصر کو ہر قیمت پر شکست دی جائے گی۔ انہوں نے کہا کہ دہشت گرد قوم کو تقسیم کرنا چاہتے ہیں، لیکن ریاست ہر صورت میں قائم رہے گی اور دہشت گردی کے خلاف جنگ جیتی جائے گی۔
صدر مملکت نے انسداد دہشت گردی ونگ کو جدید اسلحہ فراہم کرنے کا اعلان بھی کیا۔ انہوں نے کہا کہ بلوچستان ان کے دل کے قریب ہے اور وہ صوبے کی ترقی اور پائیدار امن چاہتے ہیں۔ انہوں نے بلوچستان کے ہر بچے کو اسکول میں دیکھنے کی خواہش کا اظہار کیا اور کہا کہ جدید ٹیکنالوجی سے بچوں کو روشناس کروانا وقت کی ضرورت ہے۔
اجلاس میں قائم مقام گورنر بلوچستان کیپٹن ریٹائرڈ عبدالخالق اچکزئی، چیف سیکرٹری بلوچستان شکیل قادر خان، آئی جی پولیس معظم جاہ انصاری سمیت اعلیٰ حکام نے شرکت کی۔
