جامشورو: رپوٹ محمد نصیر ساگر آل ریونیو سندھ ایمپلائز ایسوسی ایشن کے زیرِ اہتمام ڈپٹی کمشنر آفس جامشورو میں محکمہ ریونیو کے 17 ملازمین کی ترقیوں کی خوشی میں ایک تقریب منعقد کی گئی، جس میں ڈپٹی کمشنر جامشورو غضنفر علی قادری اور آل ریونیو سندھ ایمپلائز ایسوسی ایشن کے مرکزی صدر سید سردار علی شاہ نے ترقی پانے والے ملازمین میں پروموشن لیٹر تقسیم کیے۔ اس موقع پر ڈپٹی کمشنر جامشورو غضنفر علی قادری نے خطاب کرتے ہوئے کہا کہ سرکاری ملازمین کو قانون اور قواعد و ضوابط کے مطابق ان کے جائز حقوق فراہم کرنا اور ترقیوں کے معاملات میں انصاف کو یقینی بنانا انتظامیہ کی ذمہ داری ہے۔ ملازمین کے سروس ریکارڈ اور مستقبل سے متعلق معاملات میں کسی قسم کی کوتاہی نہیں ہونی چاہیے، جبکہ ان کے جائز کیسز متعلقہ حکام کے سامنے بروقت پیش کرنا ضروری ہے۔ انہوں نے کہا کہ کمشنریٹ، بورڈ آف ریونیو اور دیگر متعلقہ اداروں میں ملازمین کے جائز کیسز بروقت پیش کیے جائیں تاکہ انہیں بلاوجہ تاخیر کے بغیر قانون کے مطابق ان کے حقوق مل سکیں۔ انہوں نے آل ریونیو سندھ ایمپلائز ایسوسی ایشن کی جانب سے ملازمین کی فلاح و بہبود کے لیے کی جانے والی کوششوں کو سراہتے ہوئے انتظامیہ کی جانب سے بھرپور تعاون کی یقین دہانی بھی کرائی۔ محکمہ ریونیو میں ہونے والی ترقیوں کے تحت 3 تپیداروں کو سپروائزر تپیدار، 4 جونیئر کلرکس کو سینئر کلرک اور 10 نائب قاصدوں کو جونیئر کلرک کے عہدوں پر ترقی دی گئی۔ تقریب سے خطاب کرتے ہوئے آل ریونیو سندھ ایمپلائز ایسوسی ایشن کے مرکزی صدر سید سردار علی شاہ نے کہا کہ ملازمین کو چاہیے کہ وہ محکمہ ریونیو کی بہتری کے لیے اپنا بھرپور کردار ادا کریں اور اپنے اعلیٰ افسران کی قانونی اور انتظامی ہدایات پر ذمہ داری کے ساتھ عمل کریں۔ انہوں نے حضرت علی علیہ السلام کی تعلیمات کا حوالہ دیتے ہوئے کہا کہ انسان کو ایسے نیک اعمال کرنے چاہئیں کہ دنیا اور آخرت میں اسے اس کے اچھے کاموں کی وجہ سے یاد رکھا جائے۔ اس موقع پر ایسوسی ایشن کے مرکزی صدر سید سردار علی شاہ، ضلعی صدر محمد موسیٰ رودناڑی اور دیگر ساتھیوں کی جانب سے ملازمین کے حقوق اور فلاح و بہبود کے لیے کی جانے والی کوششوں کو سراہا گیا۔ ترقی پانے والے ملازمین کو مبارک باد دیتے ہوئے امید ظاہر کی گئی کہ آئندہ ترقیوں کے زیرِ التوا کیسز بھی بلاوجہ تاخیر کے بغیر نمٹائے جائیں گے۔ تقریب میں ایڈیشنل ڈپٹی کمشنر ٹو محمد طارق کاکا، اسسٹنٹ کمشنر کوٹری عبدالشکور سولنگی، آل ریونیو سندھ ایمپلائز ایسوسی ایشن کے ضلعی صدر محمد موسیٰ رودناڑی، حیدرآباد سے ایسوسی ایشن کے اراکین اور محکمہ ریونیو کے افسران نے شرکت کی۔ Post navigation ہری پور: بدلتا خیبر پختونخوا مہم کے تحت فوڈ سیفٹی ٹیم کی بڑی کارروائی، 50 کلو مضرِ صحت مچھلی تلف، بھاری جرمانے عائد گورنمنٹ ماڈل پرائمری سکول نوکریاں میں بڑی چوری
